இன்றைய எந்திர யுகத்தில் மூலிகைகளின் பயன்பாடு என்பது அன்றாட வாழ்க்கை முறையில் இருந்து வெகு தொலைவுக்கு சென்றுவிட்டது என்றே கூறலாம். சாதாரண காய்ச்சல் என்றாலே அடுத்த நிமிடம் நாம் விரைந்து செல்லும் இடம் மருத்துவமனைகளாகத்தான் இருக்கின்றன. ஆனால், நம் முன்னோர்கள் கண்டறிந்த மூலிகைகள் எல்லா காலங்களிலும் பலன் தந்துகொண்டிருக்கின்றன. அப்படிப்பட்ட மூலிகைச் செடிகளை வளர்க்க சென்னை மாநகராட்சி முயற்சிகளை எடுத்துள்ளது.
கான்கிரீட் கட்டடங்கள் நிறைந்துள்ள சென்னை போன்ற மாநகரங்களில் , பசுமையான இடங்களைப் பார்ப்பதே அரிதாகத்தான் இருக்கிறது. இந்த சூழலில், கண்ணுக்கு குளிர்ச்சியாக காட்சியளிக்கும் சிறுவர் விளையாட்டுப் பூங்கா ஒன்று சென்னையில் இருக்கிறது. இது வெறும் பூங்கா மட்டும் இல்லை. முகலிவாக்கத்தில் உள்ள ஏ.ஜி.எஸ்.,காலனியில் அமைந்துள்ள மூலிகைத் தோட்டம். நமது பாரம்பரிய மூலிகைகளின் பயன்களை நகர வாழ்க்கையின் வேகத்தில் மறந்து விட்டு வாழும் மக்களுக்கு அவற்றை மீண்டும் அறிமுகப்படுத்தும் ஒரு முயற்சியாக சென்னை மாநாகராட்சி உருவாக்கி உள்ள பசுமை மூலிகை தோட்டம்தான் இது.
கடந்த நிதியாண்டில் மாநகர மேம்பாட்டிற்காக எடுத்துக் கொள்ளப்பட்ட இந்த பூங்கா இன்று ஒரு அழகான மூலிகைத் தோட்டமாக உருவெடுத்துள்ளது. இதேபோல் 2013-2014 நிதியாண்டில் சென்னையில் மேலும் 11 பூங்காக்கள் மூலிகைத் தோட்டங்களாக உருமாறும் என்கிறது சென்னை மாநகராட்சி.